mi la, ike pi (pali ala) li lon.

ike ni li seme? tenpo li open, li kama pini la, jan li pini ala e pali ona la, ni li ike pi (pali ala lon tenpo). toki lili la, ni li ike pi (pali ala). toki [ilo n li ilo] la, ike ni li ike [pana o kala a nena e sike uta n].

tenpo mi pi (kama sona) li pini la, mi tawa pali lon tenpo sike tu tu. taso, pini la, pali li kama mute li kama ike a, wawa sijelo en wawa lawa mi li kama lili. ni la, pilin ike mute la, mi pini e pali mi, li weka tan pali.

tenpo ni la, mi jo ala e pali mani. taso, ijo musi mute li lon. mi pilin musi tawa ijo mute a, tenpo ni li pona mute tawa pali musi. mi toki insa e ni: mi wile sona e ijo mute a! tenpo pi (pali mani ala) li pini la, sona mi li kama suli li kama wawa a!

taso, mi wile ala e pali. lawa mi li wile, taso sijelo mi en pilin mi li wile ala. ni li tan seme? tan tu wan li lon. nanpa wan la, wawa mi li awen lili. ken la, lape mi li suli ala. kin la, lawa mi li ike lili. mi sona ala, taso mi pilin wawa lili lon tenpo mute. tan pi (nanpa tu) la, pali ni li pali mi taso lon tenpo ni. tenpo pini la, pali mani li lon la, pali musi li pali taso ala. ni la, pali musi li musi mute a, li pona e ike pi (pali mani). taso, tenpo ni la, pali musi li pali mi taso. kon pi (pali musi) li kama suli la, musi li kama musi lili, li kama musi ala. tan pi (nanpa tu wan) la, tenpo pini pali li lon ala. jan pali ante li lon ala, mi taso li wile pali e ni. ni la, wile pali li kama ala.

mi pilin ike. mi sama e tomo tawa waso pi (tawa sewi) pi (wawa lili) lon tenpo ni. tomo tawa waso la, nasin pi (tawa sewi) li suli la, wawa mute li wile. taso, wawa li lon nanpa awen, li ken ala kama nanpa ale. ni la, nasin pi (tawa sewi) li kama suli li kama suli mute la, waso li ken ala tawa sewi, li kama tawa ma, li ken pakala lon ma kepeken tenpo lili. ni li ijo ike suli a, jan waso li ken moli tan ni. ni la, jan lawa pi (tomo waso) li pali mute tawa pini pi (ike ni). taso, mi sama e tomo waso pi (wawa lili) lon tenpo ni. wawa mi li ken ala tawa e waso tawa sewi, ni la, waso li tawa ma, li wile pakala. mi wile ala e pakala, taso wawa mi en wile mi li lili.

tenpo wan la, ni lukin e sitelen tawa tan jan [jo o] [pali a nena a telo e]. sitelen ni li toki e nasin, nasin ni li ken pona e wile tawa. sitelen tawa ni pi (jan [jo o]) li toki e pona, nasin ni li pona, taso mi wile ala e nasin ni. mi wile ala e pali, mi wile ala pona e ike pi (pali ala) kin. ni li musi a a a. seme li ken pona e mi? mi sona ala.